Vestfirðir

Hótel Ísafjörður
Silfurtorgi 2, 400 Ísafjörður
S: 456-4111
info@hotelisafjordur.is
www.hotelisafjordur.is

Hótel Ísafjörður er þriggja stjörnu hótel við Silfurtorg, í hjarta Ísafjarðar. Á hótelinu eru 36 tveggja manna herbergi. Hótelið var nýlega innréttað í léttum, skandinavískum stíl og er frábært útsýni úr öllum herbergjum, annað hvort yfir Silfurtorg eða Pollinn. Jafnframt er á hótelinu ein fullbúin svíta.

Á Hótel Ísafirði er fyrirmyndar fundaraðstaða fyrir 40-50 manns með nýjustu tækni. Matsalur hótelsins rúmar veislur fyrir allt að 100 manns. Veitingahúsið Við Pollinn er á neðstu hæð hótelsins. Þá eru aðrir, stærri fundarsalir í göngufæri frá hótelinu. Starfsfólk hefur áralanga reynslu af skipulagningu ýmis konar funda og ráðstefna og getur hæglega verið innan handar varðandi skipulagningu dagskrár, skoðunarferða og annarrar dægradvalar.

Arnardalur

Heimabæ, Arnardal, 401 Ísafjörður

S: 860-6062

www.arnardalur.is

Arnardalur er í utanverðum Skutulsfirði, í um 10 mínútna fjarlægð frá Ísafirði. Þar hafa fjárhús og hlaða öðlast algjörlega nýtt hlutverk eftir miklar endurbætur. Fjárhúsið hefur verið klætt og innréttað og er nú hægt að halda þar fundi, ráðstefnur, móttökur og veislur fyrir allt að 70 manns. Internettenging, skjávarpi og hljóðkerfi eru í boði í þessu nýtísku fjárhúsi svo fundargesti ætti ekki að vanhaga um neitt. Hægt er að kaupa ýmis konar veitingar fyrir hópa.

Djúpur dalur liggur inn af Heimabæ en í göngufæri til austurs er Arnarnes þar sem í boði er magnað útsýni yfir Ísafjarðardjúp og blóðrautt sólarlag sem óvíða þykir fegurra en á nesinu.

Hægt er að panta skemmtilega afþreyingu og sjá húsráðendur um að skipuleggja ratleiki og/eða aðra samkvæmisleiki ef svo ber undir.

Byggðasafnið

Neðstakaupstað, 400 Ísafjörður

S: 456-3291

www.nedsti.is

Byggðasafn Vestfjarða er til húsa í Turnhúsinu svokallaða sem ásamt Tjöruhúsinu, Krambúðinni og Faktorshúsinu mynda elstu húsaþyrpingu landsins í Neðstakaupstað á Ísafirði. Í safninu eru til sýnis ýmsar merkar minjar frá fornri tíð og lögð er sérstök áhersla á sjóminjar eins og staðsetning safnsins gefur tilefni til. Húsið sjálft og í raun Neðstikaupstaður allur eru í sjálfu sér stórmerkilegur safngripur og er leitun að öðru safni með eins viðeigandi umhverfi og Byggðasafn Vestfjarða.

Í Turnhúsinu er í boði að halda móttökur fyrir um 80 manns. Umgjörðin verður óvíða skemmtilegri og sérstakari en þar.

Edinborgarhúsið

Aðalstræti 7, 400 Ísafjörður

S: 456-5444

www.edinborg.is

Edinborgarhúsið er fornfrægt verslunar- og fiskvinnsluhús, bárujárnsklætt og stendur við miðbæ Ísafjarðar. Húsið er alls um 1.700 fermetrar á þremur hæðum, reist árið 1907 af miklum stórhug og bar þá höfuð og herðar yfir önnur mannanna verk á norðanverðum Vestfjörðum. Edinborgarhúsið var tekið í gegn frá grunni fyrir nokkrum árum og þar innréttuð alhliða menningarmiðstöð. Reglulega eru þar sett upp leikrit og tónleikar og aðrir listviðburðir.

Þrír salir eru í húsinu sem allir henta prýðisvel undir ráðstefnu- og fundahald. Á fyrstu hæð er Rögnvaldarsalur sem tekur um 80 manns í sæti. Á jarðhæð er Bryggjusalur sem tekur um 120 manns og Edinborgarsalur um 200 manns. Opna má á milli tveggja síðastnefndu salanna. Hljóðkerfi, skjávarpi og Internet standa til boða í öllum þremur sölunum. Í húsinu er einnig veitingastaður sem tekur um 100 manns í sæti.

Einarshúsið

Hafnargötu 41, 415 Bolungarvík

S: 456-7901, 864-7901

www.einarshusid.is

Í þessu merka húsi bjuggu tveir mestu athafnamenn Bolungarvíkur á 20. öldinni, þeir Pétur Oddsson og Einar Guðfinnsson. Húsið er tvílyft timburhús á steinsteypukjallara, byggt árið 1904 og var á sínum tíma með stærstu og reisulegustu íbúðarhúsum landsins.

Húsið var í niðurníðslu þegar núverandi eigendur tóku við því fyrir fimm árum en það hefur nú verið endurbyggt í sinni upprunalegu mynd og þykir hin mesta bæjarprýði í dag.

Í húsinu er fundaraðstaða fyrir 40 til 50 manns. Þar er í boði öll nútíma aðstaða; Internet, skjávarpi og hljóðkerfi. Veitingastaður er á fyrstu hæð hússins þar sem áhersla er lögð á ferska sjávarrétti. Í kjallara hússins er síðan staðsett krá þeirra Bolvíkinga sem opin er um helgar og þegar þörf er á.

Faktorshúsið

Aðalstræti 42, 400 Ísafjörður

S: 899-0742

http://www.randburg.is/is/aslaug/

Faktorshúsið í Hæstakaupstað var reist árið 1788. Árið 1993 var það í niðurníðslu eftir áratuga vanrækslu sem leiddi af sér minnkandi vegsemd þess með hverju árinu. Það var endurreist frá grunni og náði um síðustu aldamót þeirri reisn sem það á skilið. Húsið sem var lengst af íbúðarhús er nú kaffi- og veitingastaður á tveimur hæðum, rúmar samtals um 80 manns í nokkrum misstórum veitingastofum, sem henta fyrir 8-30 manna hópa. Þar eru haldnir fundir, þorrablót, veislur og bókakynningar svo eitthvað sé nefnt. Í Faktorshúsinu er þráðlaus nettenging.

Húsið er búið fallegum antikhúsgögnum og fullkomnu eldhúsi. Efri hæð hússins skiptist í tvennt, lítinn, hráan-skarsúðaðan sal annars vegar og fallega (brúðar)svítu hins vegar. Hægt er að fá söguleiðsögn um Faktorshúsið. Saga í hverri spýtu!

Hótel Núpur

Núpi, Dýrafirði, 471 Þingeyri

S: 456-8235

www.hotelnupur.is

Hótel Núpur er í fyrrum héraðsskóla að Núpi í Dýrafirði, umvafinn tignarlegum fjöllum með ólýsanlegu útsýni yfir fegurstu tinda Vestfjarða og sægrænan Dýrafjörðinn. Steinsnar frá hótelinu eru margar af perlum Vestfjarða, eins og til dæmis Skrúður, elsti skrúðgarður landsins sem aðrir slíkir garðar draga nafn sitt af. Dynjandi í Arnarfirði og fjallið Kaldbakur eru aðrir staðir sem vert er að heimsækja.

Á Núpi þurfa menn ekki að sitja eins og síld í tunnu, þar er vítt til veggja og stórir salir. Matsalur ræður við um 250 manna ráðstefnu, íþróttasalur tekur um 300 í sæti og þar að auki eru fimm stofur sem hver um sig rúma milli 30 og 50 manns. Boðið er upp á skjávarpa, Internet og hljóðkerfi. Þá er gistirými fyrir um 90 manns í uppábúnum rúmum auk þess sem svefnpokagisting er í boði fyrir hópa.

Náttúrugripasafn Bolungarvíkur

Vitastígur 3, 415 Bolungarvík

Sími: 456-7507

Netfang: nagr@nave.is

http://www.natturugripasafn.is/

Í Náttúrugripasafninu í miðbæ Bolungarvíkur er funda- og ráðstefnusalur sem er samtengdur við Náttúrustofu Vestfjarða.

Í salnum eru sæti fyrir allt að 80 manns, skjávarpi og þráðlaust net. Hægt er að bjóða upp á þjónustu fyrir útprentun og ljósritun. Aðgengi er fyrir fatlaða ásamt salerni fyrir hjólastóla. Möguleiki er á að bjóða upp á kaffi og/eða veitingar í hliðarsal en einnig er veitingastaður í næsta húsi.

Þar sem fyrirlestrasalurinn er samtengdur sýningarsal Náttúrugripasafnsins er umhverfið óneitanlega sérstakt. Í safninu er stórt fuglasafn auk þess sem þar eru m.a. spendýr, steinar, egg og skeljar. Gott getur verið að teygja úr sér eftir langa setu og rölta um fallegt safn.

Safnahúsið

Eyrartúni, 400 Ísafjörður

S: 450-8220

www.safn.isafjordur.is

Safnahúsið á Ísafirði, eða gamla sjúkrahúsið, er af mörgum talin ein fallegasta húsbygging landsins. Húsið var vígt árið 1925 og gegndi hlutverki sjúkrahúss fram á níunda áratug síðustu aldar. Sjúkrahúsið var glæsilegasta hús sinnar tegundar hér á landi á sínum tíma og ber vitni um stórhug og djörfung þeirra sem að því stóðu. Það var eign Ísafjarðarkaupstaðar og rekið að öllu leyti fyrir hans reikning og á hans ábyrgð.

Í húsinu eru nú Bæjar- og héraðsbókasafnið á Ísafirði, Ljósmyndasafn Ísafjarðar, Héraðsskjalasafnið og Listasafn Ísafjarðar. Í húsinu er veislu-, funda- og ráðstefnusalur fyrir allt að 60 manns með aðgangi að skjávarpa og Interneti.

Skrifstofuhótelið

Hafnarstræti 9, 400 Ísafjörður

S: 450-5300

www.skrifstofuhotel.is

Skrifstofuhótelið á Ísafirði hóf starfsemi árið 2006 og er á þriðju hæð hins nýja verslunar- og þjónustuhúsnæðis Neista í miðbæ Ísafjarðar, steinsnar frá allri opinberri þjónustu sem er í boði á norðanverðum Vestfjörðum.

Í boði eru þrjár fullbúnar skrifstofur, glæsilegur fundarsalur fyrir 12 manns með öllum helstu þægindum svo sem tölvutengdum 50 tommu sjónvarpsskjá og ADSL sjónvarpi, þráðlausu lyklaborði og mús, háhraða Internettengingu, fundarsíma, flettitöflu. Þá eru tenglar fyrir fartölvur, Internet og rafmagn í fundarborðinu.

Einnig er í boði ráðstefnu- og móttökusalur með skjávarpa, þar sem 40-50 komast fyrir standandi, eða 30 í sæti.

Skrifstofuhótelið sér um útvegun veitinga ef óskað er.

Heydalur
Heydal, Mjóafirði, 420 Súðavík
S: 456-4824
heydalur@heydalur.is
www.heydalur.is

Sveitahótelið Heydalur er í 135 km fjarlægð frá Ísafirði og 320 – 360 km fjarlægð frá Reykjavík eftir því hvaða leið er valin. Veitingasalur rúmar vel 100 manns og heppileg fundaraðstaða er fyrir 10 – 40 manns. Boðið er upp á gistingu fyrir 20 – 30 manns í átta, tveggja manna herbergjum og einu þriggja manna herbergi með sér baðherbergjum og fimm tveggja manna herbergjum í sumarbústað.Gott tjaldstæði. Náttúrulaug vígð af Gvendi góða.

Gnægð afþreyingar er í boði. Kajak- og hestaleiga og veiði í vötnum á sumrin og á veturna vélsleðaferðir og ágætis gönguskíðaleiðir. Falleg gönguleið er inn dalinn sem eitt sinn rúmaði 13 bæi. Ríkt fuglalíf og fugla- og plöntuspjöld eru til fróðleiks. Húsráðendur eru sveigjanlegir og reyna að mæta þörfum sinna gesta.